ٹنگمرگ// سیاحتہ مقام درنگ ٹنگمرگ میں شام دیر گئے پیش آمدہ ایک سڑک حادثے کے دوران ایک نوجوان کی موت واقعہ ہوئی ہے جبکہ اُنکے ساتھ موٹر سائیکل پر سوار اُنکے دوست شدید زخمی ہوئے ہیں۔اس دوران بابا ریشی میں ایک اور سڑک حادثے کے دوران سُمبل سوناواری کے ایک نوجوان کے شدید زخمی ہونے کی اطلاع ہے۔
درنگ-ٹنگمرگ روڑ پر شام چھ بجے کے قریب اُسوقت ایک المناک حادثہ پیش آیا کہ جب تیزی سے جارہی ایک مورٹر سائیکل،رجسٹریشن نمبر4240 JK13، گہری کھائی میں جاگری۔بد نصیب مورٹر سائیکل پر دو نوجوان سوار تھے جنہیں آس پاس موجود لوگوں نے خون میں لت پت پاکر اُٹھا لیا تاہم ایک نوجوان کی موقعہ پر ہی موت واقعہ ہوئی تھی ۔دوسرے نوجوان کو زخمی حالت میں سب ضلع اسپتال ٹنگمرگ پہنچایا گیا ہے اور اُنکی حالت خطرے سے باہر بتائی جاتی ہے۔
دونوں گہرے دوست سیر سپاٹے کے لئے نکلے ہوئے تھے اور واپسی پر اُنہیں حادثہ پیش آیا۔
حادثے میں لقمہ اجل بن چکے نوجوان کی شناخت ، محسن احمد ماگرے اور زخمی کی شناخت شوکت احمد ماگرے کے بطور ہوئی ہے۔ذرائع کے مطابق دونوں گہرے دوست سیر سپاٹے کے لئے نکلے ہوئے تھے اور واپسی پر اُنہیں حادثہ پیش آیا۔ان ذرائع کے مطابق محسن احمد ماگرے چندی لورہ ڈگری کالج کے ایک ہونہار اور مانے جانے والے طالبِ علم تھے۔محسن کے والدین دو روز قبل سفرِ محمود پر روانہ ہوچکے ہیں ۔محسن کی لاش اُنکے آبائی گاوں پہنچائی گئی تو یہاں صفِ ماتم بچھ گئی اور پورا ماحول سوگوار ہوگیا۔بعدازاں سینکڑوں لوگوں نے نمازِ جنازہ میں شرکت کی اور نم آنکھوں کے ساتھ لحد میں اُتارا۔
اُدھر باباریشی کراسنگ کے قریب پیش آمدہ ایسے ہی ایک سڑک حادثے میں ایک نوجوان کے بُری طرح زخمی ہونے کی اطلاع ہے۔ذرائع نے مذکورہ کی شناخت سُمبل سوناواری کے عاقب احمدکے بطور کی ہے اور کہا ہے کہ اُنہیں جی وی سی میڈیکل کالج بمنہ منتقل کیا جا چکا ہے۔
