سرینگر// پاکستان کرکٹ ٹیم کے اوپننگ کھلاڑی فخرالزماں ون ڈے کرکٹ میں ڈبل سینچری کرنے والے پاکستان کے واحد کھلاڑی بھی بن گئے ہیں جبکہ زمان اور امام الحق نے 304 رنز کی اوپننگ شراکت داری قائم کرتے ہوئے عالمی ریکارڈ قائم کیا ۔
تفصیلات کے مطابق پاکستان کی قومی کرکٹ ٹیم آج زمبابوے کے خلاف چوتھا ون ڈے میچ کھیل رہی ہے جس میں فخرالزماں نے بلے بازی کے انتہائی شاندار ریکارڈ قائم کئے ہیں۔ وہ ون ڈے کرکٹ میں 194 رنز کا سعید انور کاریکارڈ توڑتے ہوئے 200 رنز بنانے والے پاکستان کے واحد کھلاڑی بھی بن گئے ہیں ۔ فخرالزماں نے 148 گیندوں پر 24 چوکوں اور 5 چھکوں کی مدد سے 201 رنز کی اننگ کھیلی اور شاندار ریکارڈ اپنے نام کر لیا ۔
فخرالزماں نے بھارت کے خلاف فائنل میچ میں سینچری بنا کر بڑا ہدف دینے میں بڑا کردار ادا کیا اور پاکستان بھارت کو شکست دینے میں کامیاب ہوا تھا ۔
واضح رہے کہ ون ڈے کرکٹ میں سب سے پہلے ڈبل سنچری بھارتی بلے باز سچن ٹنڈولکر نے 2010 میں بنائی تھی۔ اب تک مجموعی طور پر ایک روزہ کرکٹ میں 7 ڈبل سنچریاں بنی ہیں جن میں سے پانچ بھارتی اور دو دیگر ملکوں کے کھلاڑی شامل ہیں۔ بھارتی کھلاڑی روہت شرما دنیا کے واحد کھلاڑی ہیں جو ایک روزہ کرکٹ میں تین ڈبل سنچریاں سکور کرچکے ہیں۔ سچن ٹنڈولکر کی جانب سے ڈبل سنچری کیے جانے سے قبل ون ڈے کرکٹ میں سب سے زیادہ رنز سکور کرنے کا ریکارڈ پاکستان کے سابق اوپنر سعید انور کے پاس تھا جو انہوں نے 21 مارچ 1997 کو 194 رنز بنا کر قائم کیا تھا۔
یہاں یہ امر بھی قابل ذکر ہے کہ چیمپئنز ٹرافی میں فخرالزماں نے بھارت کے خلاف فائنل میچ میں سینچری بنا کر بڑا ہدف دینے میں بڑا کردار ادا کیا اور پاکستان بھارت کو شکست دینے میں کامیاب ہوا تھا ۔
