لاہور// پاکستان سپر لیگ (پی ایس ایل) کے چیئرمین نجم سیٹھی بلا مقابلہ پاکستان کرکٹ بورڈ (پی سی بی) کے چیئرمین منتخب ہو گئے ہیں۔
تفصیلات کے مطابق نیشنل کرکٹ اکیڈمی (این سی اے) میں بورڈ آف گورنرز کا خصوصی اجلاس ہوا جس میں پی سی بی کے نئے چیئرمین کا انتخاب کیا گیا۔ ذرائع کے مطابق نجم سیٹھی بلا مقابلہ نئے چیئرمین منتخب ہو گئے ہیں جنہوں نے بورڈ آف گورنرز کے اجلاس کی صدارت بھی سنبھال لی ہے۔
واضح رہے کہ شہریار خان مدت پوری ہونے پر چیئرمین پی سی بی کے عہدے سے سبکدوش ہو گئے تھے۔ بورڈ آف گورنرز کا اجلاس شروع ہوتے ہی یہ اعلان کیا گیا کہ بورڈ کا کوئی بھی ممبر چیئرمین کے عہدے کیلئے کاغذات نامزدگی جمع کرا سکتا ہے تاہم کوئی بھی نجم سیٹھی کے مقابلے میں نہیں آیا۔
پاکستان کرکٹ بورڈ کے آئین کے تحت 10 رکنی بورڈ آف گورنرز میں ریجن اور اداروں کے چار چار اراکین شامل ہوتے ہیں جبکہ دو کا تقرر وزیراعظم کی جانب سے ہوتا ہے۔
نجم سیٹھی اس سے قبل بھی پاکستان کرکٹ بورڈ کے چیئرمین رہ چکے ہیں لیکن ماضی میں انہیں ذ کا اشرف کے مقابلے میں عدالتی کارروائی کا سامنا رہا۔
مئی 2013 میں اسلام آباد ہائی کورٹ کی جانب سے ذ کا اشرف کی معطلی کے بعد جون میں نجم سیٹھی کو پاکستان کرکٹ بورڈ کا عبوری چیئرمین مقرر کیا گیا تھا لیکن اسی سال اکتوبر میں اسلام آباد ہائی کورٹ کے جسٹس شوکت عزیز صدیقی نے نجم سیٹھی کو کام کرنے سے روک دیا تھا۔
اکتوبر 2013 میں ہی اس وقت کے وزیراعظم نواز شریف نے اسلام آباد ہائی کورٹ میں زیر سماعت کرکٹ بورڈ کے مقدمے کے پیش نظر نجم سیٹھی کی سربراہی میں پانچ رکنی ایڈہاک منیجمنٹ کمیٹی قائم کردی جس کے دیگر ارکان میں شہریارخان، ظہیر عباس، نوید اکرم چیمہ اور ہارون رشید شامل تھے۔
جنوری 2014 میں اسلام آباد ہائی کورٹ نے ذکا اشرف کو ان کے عہدے پر بحال کر دیا لیکن فروری میں اس وقت کے وزیراعظم نواز شریف نے ذکا اشرف کو ان کے عہدے سے ہٹا کر پاکستان کرکٹ بورڈ کی باگ ڈور گیارہ رکنی کمیٹی کے سپرد کر دی جس کے سربراہ نجم سیٹھی تھے۔
مئی 2014 میں اسلام آباد ہائی کورٹ نے ذکا اشرف کو ایک بار پھر بحال کر دیا لیکن سپریم کورٹ نے اسلام آباد ہائی کورٹ کے فیصلے کو معطل کرتے ہوئے نجم سیٹھی کی بحالی کا حکم سنا دیا۔
عدالتی جنگ کے اس طویل سلسلے کا ڈراپ سین اس طرح ہوا کہ نجم سیٹھی نے سپریم کورٹ کے سامنے اپنے بیان میں پاکستان کرکٹ بورڈ کے چیئرمین کے اگلے انتخاب میں حصہ نہ لینے کا فیصلہ کیا اور اگست 2014 میں شہریار خان پاکستان کرکٹ بورڈ کے بلامقابلہ چیئرمین منتخب ہوگئے جبکہ نجم سیٹھی نے ایگزیکٹیو کمیٹی کے چیئرمین کی ذمہ داری سنبھال لی۔
گذشتہ تین سال کے دوران نجم سیٹھی پاکستان کرکٹ بورڈ کی طاقتور ترین شخصیت کے طور پر سامنے آئے اور کرکٹ بورڈ کے ہر اہم فیصلے میں ان کی مرضی شامل رہی۔
نجم سیٹھی پاکستان سپر لیگ کے سربراہ کی حیثیت سے اس ایونٹ کا دو سال سے انعقاد کر رہے ہیں۔ان کا شمار ملک کے سینئر صحافیوں اور تجزیہ کاروں میں ہوتا ہے۔
وہ 2013 کے عام انتخابات کے موقع پر پنجاب کے نگراں وزیراعلیٰ کے فرائض بھی انجام دے چکے ہیں۔
