سرینگر// نیشنل کانفرنس اور پی ڈی پی کو انا چھوڑ کر مشترکہ سرکار بنانے اور کشمیریوں کی تذلیل کا جواب دینے کی تجویز دینے والے عوامی اتحاد پارٹی کے صدر اور ممبر اسمبلی لنگیٹ کو گورنر نے نظر انداز کرتے ہوئے کُل جماعتی میٹنگ میں مدعو نہیں کیا۔ بی جے پی کی جانب سے پی ڈٰ پی کی حمایت واپس لیکر سرکار گرائے جانے کے بعد پیدا شدہ صورتحال میں مقامی سیاستدانوں کی رائے جاننے کیلئے گورنر این این ووہرا کی صدارت میں منعقدہ میٹنگ انتہائی اہم تھی تاہم انجینئر رشید کی پارٹی کو مدعو نہیں کیا گیا ۔
ریاست میں بدھ کی صبح سے گورنر راج نافذ ہونے کے بعد گورنر این این ووہرا کی طرفسے مشاورت کیلئے بلائی گئی یہ پہلی میٹنگ تھی جس میں انہوں نے مدعو سیاسی پارٹیوں اور شخصیات سے انکی رائے مانگی۔ابھی ابھی اقتدار سے بیدخل کی جاچکی پی ڈی پی،سرکار میں اسکی شریک رہی بی جے پی،اپوزیشن نیشنل کانفرنس اور کانگریس کے علاوہ حکیم یٰسین ،یوسف تاریگامی اور سابق ممبر اسمبلی حسن میر کے جیسی چھوٹی ”پارٹیوں“ کے علاوہ دیگر کئی اشخاص بھی میٹنگ میں مدعو تھے تاہم انجینئر رشید کی عوامی اتحاد پارٹی کو مدعو نہیں کیا گیا تھا۔دلچسپ ہے کہ انجینئر رشید نے حال ہی ایک پریس کانفرنس میں نیشنل کانفرنس اور پی ڈٰ پی سے انا چھوڑ کر مشترکہ سرکار بناکر نئی دلی کی جانب سے کشمیریوں کی تذلیل کئے جانے کا مدوا کرنے کی تجویز دی تھی۔
نئی دلی نیشنل کانفرنس اور پی ڈٰ پی کو قریب آنے سے روکنے کیلئے تمام حربے آزما سکتی ہے۔
انجینئر رشید نے کہاتھاکہ اگرچہ اس بات میں کوئی شک نہیں ہے کہ مخلوط سرکار کا ٹوٹ جانا کشمیریوں کی مزاحمت کی جیت ہے تاہم جس طرح بی جے پی نے ہر کسی،باالخصوص پی ڈی پی،کو حیران کرتے ہوئے سرکار سے اپنی حمایت واپس لی وہ ریاست کی ان علاقائی جماعتوں کیلئے زناٹے دار تھپڑ سے کم نہیں ہے کہ جو ریاست کے خصوصی پوزیشن اور دیگر مفادات کیلئے لڑتے رہنے کی جھوٹی دعویداری سے لوگوں کو بیوقوف بناتی آرہی تھیں۔انجینئر رشید نے کہاتھا”نیشنل کانفرنس اور پی ڈی پی دونوں ہی بی جے پی کے محبوبہ مفتی کی سرکار سے حمایت واپس لینے کے نفسیاتی پہلو کو سمجھنے میں ناکام نظر آرہی ہیں۔حالانکہ یہ بات ایک بار پھر ثابت ہوگئی ہے کہ جموں کشمیر میں کسی کی بھی سرکار ہو نئی دلی کیلئے اسکی حیثیت ایک ٹشو پیپر سے زیادہ کچھ بھی نہیں ہے“۔
اس دعویٰ کے ساتھ،کہ اگر نیشنل کانفرنس اور پی ڈٰ پی مشترکہ سرکار بنائیں گی تو نئی دلی کو کشمیریوں کی تذلیل کرنے سے روکا جا سکتا ہے،انجینئر رشید نے کہا تھا ”جس طرح محبوبہ مفتی کو نئی دلی نے باہر کا دروازہ دکھایا ہے اس سے جموں کشمیر کی پوری مین اسٹریم کی سیاست بے وقعتی اور بے اعتباری بے نقاب ہو چکی ہے۔ یہ بات ہر کوئی جانتا ہے کہ نیشنل کانفرنس اور پی ڈی پی میں کوئی نظریاتی اختلاف نہیں ہے بلکہ یہ اقتدار کیلئے انکی لالچ،انا پرستی اور نئی دلی کے اشارے ہیں کہ جو انہیں ایک دوسرے کا دشمن بنائے بیٹھے ہیں۔حالانکہ محبوبہ مفتی کیلئے ذرہ برابر ہمدردی نہیں ہے لیکن اسکے باوجود بھی بی جے پی کی جانب سے حکومت کے پہلے دن سے انہیں نچائے جانے اور اب ذلیل کرکے پھینک دئے جانے سے لوگ ایک طرح کے احساسِ شکست کا شکار ہوگئے ہیںلہٰذا وقت آگیا ہے کہ نیشنل کانفرنس اور پی ڈی پی اپنی بلاجواز انا کو چھوڑ کر ماضی کو دفن کریں اور مشترکہ سرکار بنانے کے بعد نئی دلی کے ڈھنڈورچی بننے کی بجائے خود اپنی شرائط پر کام کرتے ہوئے اسے(دلی کو)یہاں سے شرائط منوائیں۔لوگوں کی عزت اور اعتبار کی بحالی کے مقصد سے ان دونوں پارٹیوں کا مل جانا یقیناََ مایوسی کو دور کرکے کشمیریوں کو ایک نیا حوصلہ دے سکتا ہے“۔
انجینئر رشید نے کہا کہ اس حوالے سے آپس میں بھروسہ پیدا کرنے اور عوام میں اعتماد بحال کرنے کیلئے یہ دونوں پارٹیاں اسمبلی کے دونوں ایوانوں سے باہر کسی معتبر اور غیر جانبدار شخصیت کو وزیر اعلیٰ بنانے کی تجویز پر غور کرسکتی ہیں جس سے کشمیریوں میں یہ پیغام جائے گا کہ نیشنل کانفرنس اور پی ڈی پی نے اتحاد اقتدار کیلئے نہیں بلکہ مسئلہ کشمیر کے حل کی ضرورت سمجھتے ہوئے اور نئی دلی کو یہ بتانے کیلئے کیا ہے کہ وہ شیخ عبداللہ سے لیکر محبوبہ مفتی تک جب چاہیے اپنی منتخب کردہ ٹائمنگ پر کشمیریوں کو ذلیل کرنے کیلئے ہمیشہ آزاد نہیں رہ سکتی ہے۔
اس پریس کانفرنس کے اگلے ہی دن گورنر ووہرا نے مشاورت کیلئے میٹنگ بلائی تاہم انجینئر رشید کو مدعو نہیں کیا گیا۔حالانکہ گورنر انتظامیہ کی جانب سے اس بارے میں کوئی وضاحت سامنے نہیں آئی ہے تاہم انجینئر رشید کے ترجمان ایڈوکیٹ ماجد بانڈے نے ایک بیان میں کہا کہ انکی پارٹی کو نہ بلا کر گورنر انتظامیہ نے دراصل یہ بتادیا ہے کہ انجینئر رشید کسی کی ڈکٹیشن نہیں لیتے ہیں۔انہوں نے کہا کہ چونکہ انجینئر رشید ہر بار کی طرح اب کے بھی کڑوا سچ کہتے لہٰذا انہیں مدعو نہیں کیا گیا۔انہوں نے کہا کہ انجینئر رشید کو نئی دلی کے اشارے پر میٹنگ میں نہ بلانے کا فیصلہ لیکر دلی نے دراصل اپنی بری نیت کو بے نقاب کیا ہے۔یہاں یہ بات بھی قابلِ ذکر ہے کہ انجینئر رشید نے مذکورہ بالا پریس کانفرنس میں یہ بھی الزام لگایا تھا کہ نئی دلی نیشنل کانفرنس اور پی ڈٰ پی کو قریب آنے سے روکنے کیلئے تمام حربے آزما سکتی ہے۔
