سرینگر// عوامی اتحاد پارٹی کے صدر اور ممبرِ اسمبلی لنگیٹ انجینئر رشید نے جنوبی کشمیر میں ایک اور عام شہری کے سرکاری فورسز کے ہاتھوں مارے جانے کی شدید الفاظ میں مذمت کرتے ہوئے کہا ہے کہ کشمیریوں کو مین اسٹریم کہلانے والی سیاسی جماعتوں نے دھوکہ دیا ہے۔اُنہوں نے کہا ہے کہ ایک طرف جہاں سرکاری فورسز خود کو کشمیری کا قتلِ عام کرنے کے لئے آزاد ہیں وہیں دوسری جانب یہاں کی سیاسی جماعتیں اپنی ذمہ داریاں نبھانے میں پوری طرح ناکام ہوگئی ہیں۔انجینئر رشید نے مین اسٹریک کی سیاسی پارٹیوں پر خاموش تماشائی بنے رہنے کا الزام لگاتے ہوئے کہا ہے کہ یہ جماعتیں چاہیں تو” مار دھاڑ روکنا اور سیکورٹی فورسز کو جواب دہ بنانا ان کیلئے بائیاں ہاتھ کا کھیل ہے“۔
اگر مین اسٹریم جماعتیں کچھ چیزوں کو لیکر متحد ہو جاتیں تو نہ صرف کشمیریوں کو کافی راحت ملتی بلکہ نئی دلی کے حربے کمزور پڑتے لیکن آج کی تاریخ میںساری مین اسٹریم جماعتیں ایک دوسرے کو نیچا دکھانے کیلئے وہی کچھ کر رہی ہیں جو نئی دلی کے مفادات کی تکمیل کیلئے ضروری ہے۔
آج یہاں سے جاری کردہ ایک بیان میں انجینئر رشید نے کہا ”بد قسمتی سے بیشتر مین اسٹریم جماعتوں نے پہلے 1996 میں انتخابات میں حصہ لیکرنئی دلی کو پوری دنیا کو گمراہ کرنے کا موقعہ دیا اور پھر مسئلہ کشمیر کی متنازعہ حیثیت کو کمزور کرنے اور سیکورٹی فورسز کی زیادتیوں کو جواز بخشنے کیلئے کوئی کسر باقی نہیں چھوڑی“۔انجینئر رشید نے مزید کہا ہے کہ مین اسٹریم سیاستدانوں نے گذشتہ 26برسوں کے دوران پیش آئے واقعات سے کوئی سبق سیکھا اور نہ ہی کبھی نئی دلی کو جوابدہ بنانے کی کوشش کی ۔اُنہوں نے کہا ہے” پارلیمنٹ کے لئے(ضمنی) انتخاب کے دوران ڈاکٹر فاروق عبداللہ نے حُریت میں شامل ہونے تک کی پیشکش کرکے لوگوں کی ہمدردیاں بٹورنے کی کوشش کی لیکن جب اُن کی جیت کے بعد NIAنے حُریت لیڈروں کی تذلیل کیلئے اُن کے گھروں پر چھاپے مارے توفاروق عبداللہ کی زبان پر جیسے سو من تالے لگ گئے ۔ حد تو یہ ہے کہ فاروق صاحب اب حسب ِروایت نئی دلی کیلئے کام کرتے رہنے اور کشمیریوں کی تحریک کو کمزور کرنے پر واپس آگئے ہیں “۔
انجینئر رشید نے کہا ہے کہ اگر مین اسٹریم جماعتیں کچھ چیزوں کو لیکر متحد ہو جاتیں تو نہ صرف کشمیریوں کو کافی راحت ملتی بلکہ نئی دلی کے حربے کمزور پڑتے لیکن آج کی تاریخ میںساری مین اسٹریم جماعتیں ایک دوسرے کو نیچا دکھانے کیلئے وہی کچھ کر رہی ہیں جو نئی دلی کے مفادات کی تکمیل کیلئے ضروری ہے۔