بمنہ سرینگر میں گذشتہ روز چوری کی گئی ایک موٹر سائیکل کے بارے میں سی سی ٹی وی کیمرہ سے ایک اہم سراغ حاصل ہوا ہے اور پولس نے چور کو جلد پکڑ کی اُمید ظاہر کی ہے۔
بمنہ کے اقبال آباد میں گذشتہ روز ارشد احمد نامی ایک شخص کی لال رنگ کی ہونڈا موٹر سائیکل چوری ہوگئی تھی۔ارشد احمد نے بتایا کہ اُنہوں نے معمول کے مطابق اپنے گھر کے باہر موٹر سائیکل پارک کی اور اندر چلے گئے تاہم محض چند منٹ بعد اُنہوں نے گاڑی کو غائب پایا۔اس بارے میں فوری طور پولس تھانہ بتہ مالو کو رپورٹ کیا گیا تھا۔
موٹر سائیکل کے مالک نے کہا کہ اُنہوں نے کالونی کے ایک گھر میں نصب سی سی ٹی وی کیمرہ میں چور کا چہرہ صاف دکھائی دیا ہے۔اُنہوں نے کہا کہ گذشتہ روز کسی وجہ سے اُنہیں سی سی ٹی وی تک رسائی نہیں مل پائی تھی تاہم آج جونہی سی سی ٹی وی کی ریکارڈنگ دیکھی گئی تو فیرن پہنے ہوئے ایک نوجوان کو موٹر سائیکل لیجاتے ہوئے دیکھا گیا۔اُنہوں نے کہا کہ کیمرہ کی فوٹیج پولس کے سُپرد کی گئی ہے۔
پولس نے لوگوں سے چور کی پہچان کرنے میں مدد کی اپیل کرتے ہوئے اُسے جلد پکڑ لینے کی اُمید ظاہر کی ہے۔